Sebagi ari lambar pemberita ti ngayanka pengawa ngelancar ke Program Ijazah Sarjana Muda Perguruan (PISMP) Jaku Iban.
Dr. Richard Wil Uban begambar enggau bala pembentang sereta ahli panel Simposium Jaku enggau Litaricha Iban 2014.
Pn. Corella Stephen enggau En. Mamat Unggat benung bejalaika tanggung pengawa.
Sebagi ari lambar pemberita ti ngayanka pengawa ngelancar ke Program Ijazah Sarjana Muda Perguruan (PISMP) Jaku Iban.
PISMP JAKU IBAN
Nitihka jurai David Singleton (2000), sempama datai dalam tukuh leka jaku tauka rambai jaku ti tusah disagam ngena chara literal ari dijir leka jaku . Jaku sempama nya sebengkah ari gaya jaku ti dikena mantaika buah runding. Sempama Iban endang penemu asal ti amat manah. Orang kelia ke tajam runding suah ngumbai jaku sempama nya pemanah runding terebai (potted wisdom) tauka penemu siku mensia ke ulih ari pemandai orang mayuh.
Sempama nya pengelandik dikena mensia bejaku, ngasaika pengamat, bejalaika pasal ajar enggau tangkan, dikena ngatur ulah enggau pendiau mensia sereta ngatur pengidup raban bansa diri enggau ke bukai. Sempama mega dikena orang ti landik berunding ninggalka penajam penemu diri ngagai anak, uchu enggau ichit sida. Ari asal kelia, mensia rindu agi nguna sempama ke pandak, laban nya rumpas agi dikena lebuh berumban. Bansa Iban besempama kena belapikka jaku ngambika iya tau mangka pemaiulah enggau pendiau siku-siku mensia ngena chara ensuruk tang nyemetak.
Nambahka nya sempama mega dikena ngambika orang ti kena empas jaku rara tauka sindir enda berasai ensiban sereta dikena ngayanka penalam sereta pemesai basa ngagai pangan diri, temuai pia mega sebarang orang bukai. Bisi mega sekeda sempama dikena nerangka gaya utai ke enda ulih peda ti semina ulih diasaika baka ribut tauka pangka biaubalai sereta utai ke semuti ulih dinga baka auh ujan, depur guntur, seru nyawa antu, gugu penerebai burung enggau utai bukai ke beribu leman.
Sempama kitai Iban endang sigi udah bisi sereta majak nambah kenyau ari beribu-ribu taun ke udah. Ari nya, nama penengkebang tauka pemun sempama enda ulih temu sereta enda ulih sidi agi. Pekara ke suah disempamaka kitai nya nyengkaum pengasai ati mensia, gaya pengidup, pendiau enggau ulah sida, gaya rampa menua enggau utai ke nyadi ba kandang pendiau bansa Iban ke dulu suba sereta peturun sida nyentuk ke seharitu.
Baka ke ditemu kitai, asal sempama ukai sebengkah aja. Bisi sempama tu ditengkebang mensia ke idup begulai dalam mayuh tikas pengidup baka orang kaya, mensia ti tinggi pangkat, sida ti nyadi pengarang bup tauka berita, sida ti landik bejaku, raban lemambang, tebangkar jaku Iban enggau raban bansa Iban ke bukai. Sempama endang diangkatka ari daya idup Iban enggau bansa bukai ke diau besaruk enggau sida tauka ari penemu bansa bukai ke bisi kena dinga enggau bacha sida. Nya ke alu ditunda dikena ari kelia datai ke sehari tu.
JAKU SILUP / JAKU KELAUNG
Jaku karung tauka jaku silup tu bebida ari jaku sema ke udah dikenang kitai dulu agi ari tu tadi. Kebuah pia, laban jaku silup tu bisi belalai tauka bentelah lalu ukai baka jaku sema ke alai utai endur nyemaka nya ulih dipeda, didinga tauka diasaika. Jaku silup suah enda berambai, enda betimbal lalu kadang-kadang ka seleka dua aja. Reti leka jaku tu deka mudah ditemu kitai enti disalin seleka – seleka tauka sepemanjai luntang iya. Ambika banding: ka ngabas rau ba sungai nya. Kitai deka napi penyaru enti enda berundingka silup jaku ‘ngabas rau’ lalu kitai tau ngumbai luntang jaku nya madahka orang ti bejaku nya deka mansang ke sungai meda rau. Tang reti ke bendar jaku silup nya tadi madahka diri deka berikan ba sungai nya.
Jaku silup tauka jaku kelaung tu suah dikena ba menua ke agi latung tauka agi kudi awakka pejalai kitai ti begiga enda jelungan tauka regu. Kitai mega suah ninga orang besebutka jaku munyi tu maya merau: “ngiga kerangan menyana agi unggal, endur kitai sebuat nekuka lengan dulu. Nyau nadai agi puak engkubung tu”. Nuan deka nyagam jaku nya tadi ngemai reti ‘melekuka lengan ba siku’ enggau ‘kayu engkubung nya ambis puak’ enti nuan semina meretika reti leka jaku nya ke amat tauka nuan empai kala ninga tauka enda nemu jaku silup nya tadi. Ke bendar amat, reti (entelah) jaku kelaung nya tadi “makai” enggau “lapar”. Dua bengkah jaku nya tadi mali disebut ba sungai tauka endur ke mayuh baya enggaika kitai puni lalu tau ngujungka dianu baya.
Kitai mega ngena jaku silup tauka jaku kelaung maya berandau enggau pangan diri ngambika enda bangat kelalu mantang orang ke ninga sereta ulih ngayanka basa kitai bejaku. Ambika chunto baka ‘betubuh bisi’ dikena nyebut indu ke ngandung, ‘basah jari’ dikena ngelaungka orang ti udah bedengah munsuh enggau ‘tebal pending’ dikena nyilup orang ke tan ngenatka jaku bantah orang. Kitai enda terus nyebut indu nya ngandung tauka orang nya udah bedengah laban nya kelalu mantang sereta enda nyamai didinga kelebih agi ba mua bala mayuh.
SEMA BANDING
Sema banding tauka jaku sema nya sebagi ari sempama. Taja pia, iya ukai jaku sempama tulin enti nitihka reti iya dalam jaku Iban laban nya semina jaku dikena nyemaka gaya utai ke deka diterangka ngagai peninga. Kebuah ti kedua, laban jaku sema selalu nyemetak nyebut gaya utai ke endur kitai nyemaka utai nya lalu nadai belalai tauka bentelah. Tang kebuah jaku sema tau dikumbai jaku dalam laban iya mega ngembuan reti kediri empu ti dalam sereta menyana.
Jaku sema suah bepun enggau leka jaku baka, asai enggau munyi. Ambika chunto, jaku sema ke bepun enggau baka: baka buyah ti nabakka diri ke api. Reti iya chukup terang iya nya bulih pemedis laban namaka diri ba laya orang. Jaku sema ke bepun enggau asai: asai ke lenyau gupung balung lawang. Jaku sema tu mega endang chukup terang sereta nadai belalai iya nya merampau dikejangka ambai mindah jauh.. Lalu chunto jaku sema ke bepun enggau munyi baka tu: munyi injin jait. Jaku tu pan nadai belalai lalu nyengenda amat dikena nyemaka penyampat utai. Chunto iya dalam ayat: “amat tak munyi injin jait manuk unggal dua iku nya bebintih enggau pangan diri”.
LALAU PENDIAU
Lalau pendiau iya nya jaku ke suah dikena meri lalau tauka ajar ngena chara ti lembut tauka enda kasar ngagai orang bukai sekalika nembiak tauka orang besai tuai. Lalau pendiau suah dikena meransang, ngambika orang nya bebendar agi ngereja pengawa. Ambika chunto baka: agi idup, agi ngelaban. Lalau pendiau ti baka tu balat meri perangsang tauka ngapika orang nya ransing sereta bebendar agi nurun beperang tauka ngayau.
Lalau pendiau mega dikena meri lalau tenggau ti menuku ngagai pengidup kitai mensia. Ambika chunto baka: agi bekulit agi bedaki, ti suah dikena meri jaku ajar ngagai orang nya ngambika rajin bekereja awakka semampai bulih utai lalu enda merinsa pengidup jemah ila. Kelimpah ari nya, lalau pendiau mega dikena bepesan ngagai orang ti benung ba jalai alun tauka diau ba menua orang ketegal bekereja. Ambika chunto baka: berumban belaban bemalam rantau jalai, jamah belubah nya ke tumu datai. Pesan ti baka tu ngambika orang nya enda kelalu berumban maya masang entukar tauka motosikal ba jalai alun ti tau ngujungka iya ngaga penyilap lalu bebadi.
