PISMP JAKU IBAN

Morfologi datai ari leka jaku morphologie (morphology) iya nya pampang penemu ti mansik jalai nempa leka jaku. Nyadi morfologi jaku Iban nya pampang penemu ti betungkapka struktur, tukuh enggau raban jaku. Struktur jaku mungkur munyi sebut tauka lambang tulis ti nyadi unit jaku ke bisi ngundan reti. Taja pia, tukuh jaku nya gaya unit jalai jaku, sekalika iya betukuh tunggal tauka datai ari proses meri penambah, beturuka leka jaku tauka proses betanduka jaku. Beripihka jaku ngagai raban jaku nya proses nijirka leka leka jaku ngagai raban ti bisi leman penyemaka lalu ulih dibagi nitihka fungsyen dalam raban leka jaku ke sama.

 

Morfem iya nya unit ti pengabis mit dalam jaku  ti ngembuan fungsi gramatis dalam jalai jaku.Taja pia, leka jaku nya tukuh jaku ti mit  tang ngundan reti ke menyana lalu ulih bediri kediri dalam ayat. Morfem ulih dibagi ngagai dua iya morfem betukuh meras enggau morfem betukuh berikat. Morfem meras nya ulih bediri kediri tang morfem berikat semina ulih bediri enti disukung enggau morfem bukai. Ambika chunto, leka jaku tundi enggau sekula nya morfem meras  tang penambah be- dalam leka jaku betundi enggau besekula nya morfem berikat laban unit tu enda ulih bediri kediri enti enda besukung enggau urat jaku.

 

Ari chunto nya tadi, kitai nemu leka jaku nya betukuh meras, ti ngundan reti lalu ulih bediri kediri baka lalau, pandai, bilik enggau rumah. Sibil antara leka jaku enggau morfem nya bepanggai ba pemeras iya. Enda semua morfem ulih bediri kediri sereta ngundan reti. Kebuah pia, laban enda semua morfem nya leka jaku tang semua leka jaku nya datai ari morfem. Simpul iya ditu, proses nempa jaku ba sesebengkah bansa jaku nya proses nusun morfem nitihka atur tauka sistem morfologi jaku nya. Dalam proses nempa leka jaku sekalika nya jaku Iban tauka jaku bansa bukai, tebal agi iya bepanggai ba proses ngelekatka penambah ngagai leka jaku nya ngambika nyadi menuku.