PISMP JAKU IBAN

Konsep Enggau Bidang Linguistik

 

 

1. Edward Sapir

Edward Sapir siku ari tebangkar ti tebilang ba menua Amerika Syarikat keterubah iya mansik enggau silik kaul entara pansik jaku enggau antropologi. Iya mujur bulih penemu asal dalam bidang filologi ba menua Jerman. Teori ke dibantaika Edward Sapir chukup ngemeratka langkah rapat antropologi sereta mansik tauka beratika jaku enggau fungsyen iya ari bagi mensia tauka bansa ti ngena iya. Edward Sapir mansutka penemu ti madahka jaku nya “realiti sosial”. Reti nya, mensia enda semina idup ba dunya ke nyata tauka nyengenda lalu enda idup kediri aja dalam dunya ke penuh enggau aktiviti sosial tang kitai tu tadi kena tanchang jaku kitai ti nyadi perengka komunikasyen ba genap bansa.

 

            Ari penemu ke dibantaika Edward Sapir nya tadi, kitai bela ulih nyagam jaku nya ti nentuka utai tauka pekara ke disebut kitai. Kitai mensia tentu enda ulih begulai enggau raban bansa enti nadai ngembuan jaku. Nya alai, dunya sengenda nya dunya ke ditempa tauka digaga kitai laban kitai ti nempa jaku ngagai utai ke ngelingi kitai. Taja pia, nama tauka jaku ke didinga kitai ukai dipelajarka enggau sengaja tauka formal. Kitai mensia enda milih genap bansa nadai bisi dua jaku ke sebaka. Ari nya kitai nyebut jaku ti bebida lebuh berandau tauka bejaku enggau pangan diri laban meri penama ti enda sebaka ngagai siti-siti utai tauka pekara. Reti nya, kitai mensia empu ti meri nama ke bebida-bida ngagai utai ti ngelingi sida. Ambika chunto kitai suah meri nama ke bebida baka pun kelapa, pun enyak, pun nyiur enggau ti bukai taja pan utai ke disebut nya sebaka. Baka nya mega lebuh nyebut leka jaku ukui, uduk, dog enggau ti bukai.

 

            Kelimpah ari nya, kitai mega meri reti ngagai siti-siti leka jaku nitihka peneleba diri empu (Sapir, 1929: hlm 209). Ambika banding, kitai Iban selalu nyebut “manah runding” lalu ukai “beresi runding” laban kitai enda kala ninga orang nyebut nya. Utai ke disebut kitai nya deka mandangka runding genap siku-siku kitai mensia. Nama utai ke dirunding kitai deka bepanggai ba jaku ti dikena kitai. Nya alai, chara berunding tauka bepikir enggau daya idup endang ngembuan kaul ke erat enggau jaku. Kitai deka nyamai agi ngenataika penemu enti ngembuan pengerembai tauka pemaju ba jaku. Reti nya, kitai ulih ngenatai jurai tauka penemu enggau engkeman sereta meruan lalu mudah diperetika sereta narit ati orang ti ninga.

Ari jurai ke udah dibantaika dulu agi ari tu, kitai sama nemu jaku ke bebida ngasuh kitai berunding enda sebaka. Chunto dalam English baka tu: “Mother’s mother and Father’s mother – grandmother” lalu “Mother father and Father’s father – grandfather”. Kelimpah ari nya, Edward Sapir bisi ngenataika dua hipotesis iya nya relatif jaku enggau timpai dunya. Bepelasarka hipotesis 1 relatif jaku nerangka struktur jaku kitai bebida ketegal chara bepikir tauka berunding maya nentuka jaku  ti enda sebaka. Ambika chunto, kitai Iban mayuh endar jaku dikena nyebut nama gelas baka capak, mangkuk, cangkil enggau ti bukai.

 

              Taja pia, hipotesis 2 ti dikenataika Edward Sapir  madahka timpai dunya iya nya orientasyen tauka gaya kitai berunding. Utai ke dirunding nya bekaul enggau penemu, nilai, gerayak ati, enggau adat sida. Timapai dunya nya mih ti nyadi chuan kitai mensia bepikir tauka berunding. Disimpulka kitai, timpai runding ti nentuka jaku genap iku kitai mensia. Timpai runding ditempa bepelasarka peneleba lalu peneleba nya ti nentuka jaku kitai. 

 

 

2. Ferdinand de Saussure

Ferdinand de Saussure (1857 – 1913) siku ari tebangkar linguistik Swiss ti dikumbai apai linguistik moden.  Iya ada setaun sepengudah pengada Sigmund Freud apai psikologi moden enggau Emile Durkheim apai sosiologi moden. Ferdinand de Saussure bisi ngasilka bup “Course in General Linguistics” ti naydi kelai iya nyadi apai linguistik moden. Empat pekara ba pengerembai runding linguistik ke diasilka Saussure iya nya langue enggau parole, kelai linguistik, kaul sereta sinkronik enggau diakronik. Parole nya  veriens jaku nitihka orang ti bejaku lalu langue nya jaku ke standard tauka dikena raban bansa. Nya alai parole enggau langue tu dua pekara ti bebida lalu ngembuan definisyen ke enda sebaka. Nitihka Ferdinand de Saussure, genap kelai  linguistik ngembuan kompenan signifie (ke diberi reti) enggau signifian (mandangka konsep tauka reti). Nitihka Ferdinand tu tadi, reti iya nya “konsep” ti bisi dikembuan ba sesebengkah kelai lingusitik.

 

          Ferdianand de Saussure mega bebidaka jaku nengah jalai sinkronik enggau diakronik. Sinkronik iya nya belajarka sesebangkah jaku ba siti-siti tempoh maya aja lalu nadai besangkut paut enggau sejarah tauka history. Iya bekaul enggau pansik senentang sesebengkah item dalam jaku. Bebida ari sinkronik, diakronik dikena ngiga evolution sejarah jaku nengah mayuh tikas. Diakronik betukuh sejarah; bekaul enggau langkah rapat siti-siti jaku lalu pengerembai iya sepemanjai maya. Enti diperetika, diakronik lebih ngemeratka pansik senentang sistem jaku. Ari penemu Saussure nya, kitai ulih nemu jaku (linguistik) ngembuan kaul ti erat enggau pansik semiotik. Semiotik empu endang sigi penemu ti belajarka senentang kelai sereta semua ti bisi besangkut paut enggau iya lalu ngembuan reti.